საქართველოს საგარეო საქმეთა სამინისტრო აცხადებს საგრანტო კონკურსს „ჩემი ქართული სკოლა“. საგრანტო პროგრამის მიზანია ქართული ენის სწავლების ხარისხის გაუმჯობესება, მოსწავლეების კულტურულ აქტივობებში ჩართულობის გაზრდა, საკვირაო სკოლების გაძლიერება სასწავლო მასალით და შემოქმედებითი რესურსებით, საზღვარგარეთ მოქმედი ქართული საკვირაო სკოლების მხარდაჭერა, საზღვარგარეთ საქართველოს დიპლომატიური წარმომადგენლობებისა და საკონსულო დაწესებულებების ჩართულობით.

საქართველოს საგარეო საქმეთა სამინისტრო აცხადებს დედაენის დღისადმი მიძღვნილ საგრანტო კონკურსს „ჩემი ენა ქართული“. კონკურსის მიზანია ქართული ენის სწავლების ხელშეწყობა და ქართული კულტურის პოპულარიზაცია, ასევე, დიასპორული ინიციატივების მხარდაჭერა, საზღვარგარეთ საქართველოს დიპლომატიური წარმომადგენლობებისა და საკონსულო დაწესებულებების აქტიური ჩართულობით.

2025 წლის 18 ნოემბერს, ბულგარეთის რესპუბლიკაში საქართველოს საგანგებო და სრულუფლებიანი ელჩმა, ზურაბ ხამაშურიძემ შეხვედრა გამართა ბულგარეთის ეროვნული ასამბლეის საგარეო ურთიერთობათა კომიტეტის თავმჯდომარესთან, იორდანკა ფანდუკოვასთან ბულგარეთის ეროვნული ასამბლეის საგარეო ურთიერთობათა კომიტეტის თავმჯდომარემ, ელჩს მიულოცა თანამდებობაზე დანიშვნა და წარმატება უსურვა მომავალ საქმიანობაში.

ბულგარეთის რესპუბლიკაში საქართველოს საგანგებო და სრულუფლებიანმა ელჩმა, ზურაბ ხამაშურიძემ რწმუნებათა სიგელები გადასცა ბულგარეთის რესპუბლიკის პრეზიდენტს, რუმენ რადევს. სიგელების გადაცემის ცერემონიის შემდეგ, გაიმართა ელჩისა და პრეზიდენტის შეხვედრა. მხარეებმა განიხილეს, საქართველოსა და ბულგარეთს შორის ორმხრივი თანამშრომლობის დინამიკა და შემდგომი განვითარების პერსპექტივები. შეხვედრაზე ისაუბრეს საქართველოს ევროინტეგრაციის პროცესზე. ყურადღება გამახვილდა რეგიონში არსებულ უსაფრთხოების გარემოზე.

2025 წლის 1-7 ოქტომბერს, ბულგარეთის რესპუბლიკის ქ. ვარნაში, გაიმართა თოჯინების თეატრის მე-19 საერთაშორისო ფესტივალი „ოქროს დელფინი“, რომელზეც თბილისის პროფესიულმა სახელმწიფო ახალგაზრდულმა თეატრმა წარადგინა სპექტაკლი ,,ოტელო“.

2 ოქტომბერს, ბულგარეთში საქართველოს ახლადდანიშნულმა ელჩმა, ზურაბ ხამაშურიძემ რწმუნებათა სიგელების ასლები გადასცა ბულგარეთის საგარეო საქმეთა მინისტრის მოადგილეს, ელენა შეკერლეტოვას. მინისტრის მოადგილესთან შეხვედრაზე, ელჩმა განიხილა საქართველოსა და ბულგარეთს შორის არსებული ორმხრივი ურთიერთობების დინამიკა და გამოხატა თანამშრომლობის გააქტიურების მზაობა. განსაკუთრებით, ხაზი გაუსვა, რეგიონში უსაფრთხოებისა და სტაბილურობის მნიშვნელობას და ამ კონტექსტში, ორი ქვეყნის აქტიური ჩართულობის აუცილებლობას.

ბულგარეთის რესპუბლიკაში საქართველოს საელჩოს მიერ წარმოებული სახალხო დიპლომატიის ფარგლებში, სოფიაში პოლონეთის ინსტიტუტთან თანამშრომლობით, რომელიც მიმდინარე წლის დასაწყისში დაიწყო, საქართველოს  საელჩო პირველად მოხვდა პოლონეთის უნივერსიტეტის ევროპული ქვეყნების პოეზიის პოპულარიზაციის პროექტის „პოეზია მეტროში“ ბენეფიციარად. აღნიშნული პროექტის ფარგლებში,  საელჩოს მიერ წარდგენილი შოთა რუსთაველის ეპიკური პოემიდან ამოღებული აფორიზმები ორი თვის განმავლობაში განთავსებული იქნება ქ. სოფიის მეტროში, როგორც ბულგარულ, ასევე, ქართულ ენაზე.  პროექტის ოფიციალური გახსნა, მიმდინარე წლის 19 ნოემბერს გაიმართა, ღონისძიებას ესწრებოდნენ ბულგარეთში აკრედიტირებული დიპლომატიური კორპუსის წარმომადგენლები. ელჩმა, ოთარ ბერძენიშვილმა, დამსწრე საზოგადოებას ქართულ ენაზე წაუკითხა ამონარიდები შოთა რუსთაველის პოემიდან „ვეფხისტყაოსნი“. 

ბულგარეთის რესპუბლიკაში საქართველოს საელჩოს მიერ წარმოებული სახალხო დიპლომატიის ფარგლებში, სოფიის კულტურულ ცენტრთან არსებული, ეროვნული წიგნის სახლის დირექციასთან თანამშრომლობითა და მხარდაჭერით, მიმდინარე წლის 4 ოქტომბერს, გაიმართა ქართული პოეზიის საღამო, სადაც დამსწრე საზოგადოებას საშუალება ჰქონდა გაცნობოდა ბულგარულ ენაზე ნათარგმნი შოთა რუსთაველის ეპიკურ პოემას „ვეფხისტყაოსანი“.

მ/წლის 11-13 სექტემბერს, ელჩი, ოთარ ბერძენიშვილი სამუშაო ვიზიტით ჩრდილოეთ მაკედონიის რესპუბლიკაში იმყოფებოდა. ჩრდილოეთ მაკედონიის რესპუბლიკაში, ახალი მთავრობის ჩამოყალიბებასთან დაკავშირებით, ქვეყნის პრეზიდენტმა, გორდანა სილიანოვსკა დავკოვამ, პრემიერ მინისტრმა, ჰრისტიან მიცკოვსკიმ, პარლამენტის თავმჯდომარემ, აფრიმ გაშიმ და საგარეო საქმეთა მინისტრმა, ტიმჩო მუცუნსკიმ გაცნობითი სახის შეხვედრები გამართეს არარეზიდენტ ელჩებთან (რეზიდენციით ქ.სოფიაში). გაფართოებული ფორმატის შეხვედრებზე, ყურადღება გამახვილდა ქვეყნებს შორის ურთიერთობების გაღრმავების, ეკონომიკური თანამშრომლობის გაფართოების და ცნობადობის ამაღლების საკითხებზე, ასევე ევროინტეგრაციის საკითხებზე. ამას გარდა, ელჩმა გამართა ორმხრივი შეხვედრები საგარეო და სავაჭრო საქმეთა მინისტრის და ევროინტეგრაციის სახელმწიფო მინისტრის მოადგილეებთან და შს მინისტრის კაბინეტის უფროსთან, სადაც ფართოდ მიმოიხილა ორმხრივ ურთიერთობებში არსებული საკითხები და ქვეყნის ევროპული და ევროატლანტიკური ინტეგრაციის მისწრაფებების მხარდაჭერა. ვიზიტის დასასრულს, ელჩმა შეხვედრა გამართა ჩრდილოეთ მაკედონიაში საქართველოს სათვისტომოს წარმომადგენლებთან.

10 ივნისს, ქ. პოპოვოში ონისა და პოპოვოს მუნიციპალიტეტებს შორის გაფორმდა ურთიერთთანამშრომლობის მემორანდუმი, რაც მიზნად ისახავს რეგიონალურ დონეზე, ეკონომიკის, კულტურის და განათლების მიმართულებით ურთიერთობის გაღრმავებას და სხვა საერთო ინტერესის სფეროებში თანამშრომლობის გაფართოებას. ოფიციალურ ცერემონიაში მონაწილეობდა საქართველოს საგანგებო და სრულუფლებიანი ელჩი, ოთარ ბერძენიშვილი.

მ/წლის 9 მაისს, ქ.სოფიაში გაიმართა საქართველოს ეკონომიკისა და მდგრადი განვითარების მინისტრის მოადგილის, გურამ გურამიშვილის სამუშაო ვიზიტი. ვიზიტის ფარგლებში ხელი მოეწერა მემორანდუმს, რომლის თანახმად, ბულგარეთის რესპუბლიკამ სანაპირო ნაოსნობაში ჩართული ქართველი მეზღვაურების სერტიფიკატები აღიარა. მემორანდუმის ხელმოწერამდე ქართულმა დელეგაციამ შეხვედრა გამართა ბულგარეთის რესპუბლიკის ტრანსპორტისა და კომუნიკაციების სამინისტროში, სადაც მხარეებმა განიხილეს ორ ქვეყანას შორის სამომავლო თანამშრომლობის გაღრმავების შესაძლებლობები. როგორც შეხვედრაზე აღინიშნა, ორივე ქვეყნისთვის მნიშვნელოვანია აქტიური თანამშრომლობა საზღვაო განათლების, წვრთნისა და სერტიფიცირების მიმართულებით, ასევე, შავი ზღვის რეგიონში პირდაპირი საზღვაო გადაზიდვების, მათ შორის საბორნე მიმოსვლის განვითარების კუთხით.

ქ. ბლაგოევგრადში სამუშაო ვიზიტის ფარგლებში, ელჩმა ოთარ ბერძენიშვილმა შეხვედრა გამართა ბლაგოევგრადის ამერიკული უნივერსიტეტის რექტორთან, მარგი ენსაინთან და ქართველ სტუდენტებთან. საუბარი შეეხო ქართველი სტუდენტებისთვის, ამ დროისთვის არსებული სტიპენდიების რაოდენობის გაზრდას, ასევე, საელჩოს მიერ დაგეგმლილი აქტივობებისა და ღონისძიებების საკითხებს. ვიზიტის დასასრულს, ელჩმა მოინახულა საპატიო საკონსულო, სადაც საპატიო კონსულთან იული ნუშევთან ერთად განიხილა ქართველი სტუდენტების სწავლების დაფინანსების შესაძლებლობები და ქ. ბლაგოევგრადში ქართული კულტურული ღონისძიებების ორგანიზების საკითხები.